Styret i Voss Veksel- og Landmandsbank ASA har 
handsama førebels årsrekneskap for 2009.  Resultatet 
i nominelle kroner er eit av banken sine beste.

Banken bokfører eit resultat før skatt på 30,5 mill. 
kr, mot 20,6 mill. kr i 2008.  Resultatet utgjer 
1,16% av gjennomsnittleg rådveldekapital, mot 0,86% 
for 2008. Etter skatt er resultatet 23,4 mill. kr mot 
13,9 mill. kr i 2008. 

Styret i banken gjer framlegg om å utbetala 50 kr i 
utbytte pr aksje for 2009.

Trass i stor konkurranse om kundane som set press på 
marginane og full innbetaling av avgift til Bankenes 
Sikringsfond, er rentenettoen for året sett under 
eitt auka med om lag 0,9 mill. kr, og er ved utgangen 
av året 58,9 mill. kr eller 2,24% av GFK, mot 58,0 
mill. kr eller 2,41% i 2008.

Banken har inntektsført netto utbytte, vinst og 
verdiendringar med 10,3 mill. kr. på verdipapir i 
handelsporteføljen i 2009, mot kostnadsføring på 5,2 
mill. kr i 2008.  Av desse 10,3 mill. kr er vel 9 
mill. kr realisert vinst.  Nokre selskap innan olje- 
og riggbransjen har grunna finanskrisa fått problem 
med å finansiera seg, og har opplevd konkursar og 
manglande evne til å betale inngåtte kontrakter.  
Vekselbanken har i nokon grad vore eksponert i 
obligasjonar i desse bransjane. Vi har difor bokført 
nedskriving på obligasjonar med 3,5 mill. kr i 2009, 
mot 2,2 mill. kr i 2008.

Samla driftskostnader for året er 36,0 mill. kr, ein 
auke på 3,4 mill. kr. Driftskostnadane i % av GFK 
utgjer 1,37% mot 1,35% i 2008, som samanlikna med 
andre bankar på vår storleik er godt.

Innskot frå kundar er auka med 45 mill. kr i 2009, 
eller 2,6%.  Samla innskot i forhold til brutto utlån 
er 79,7%.

I 2009 har utlån til kundar auka med 130 mill. kr, 
eller 6,2%.  

Eigenkapitaldekninga til banken ved årsskiftet er 
15,18%.  

Resultat pr. aksje er 246 kr, medan matematisk verdi 
ved årsskiftet er 2.495 kr. 

Vi har lagt bak oss eit utfordrande år for 
finanssektoren, men det gjekk betre enn alle trudde.  
For Voss sin del vart spådommen vår i fjor om at 
bølgjedalen ikkje skulle verta så stor her, kanskje 
rett.  Nokon har sjølvsagt vorte råka av problem, men 
for dei fleste har året som gjekk vore av dei aller 
beste.  Tiltakspakkene som styresmaktene sette i verk 
i fjor vil bygda vår få glede av i åra som kjem, og 
aktiviteten i nærområdet vårt vil mest truleg halda 
seg høg.  Når no "Vossapakko" endeleg er sett i gang 
vil det få store ringverknader, og vi ser alle fram 
til den dagen tungtrafikken vert borte frå sentrum.

Styret meiner at banken med sin solide eigenkapital, 
sin gode fundingssituasjon, dei solide 
tapsavsetjingane og ein nokolunde stabil 
lokalmarknad, framleis skal vera i stand til å levera 
tilfredsstillande resultat framover.  Banken sine 
finansinntekter vil verta påverka av renteutviklinga 
i marknaden og utviklinga på aksjebørsane rundt om. 
Vi forventar ein moderat auke i rentene i løpet av 
året som kjem.  
  
Fullstendig delårsrapport ligg vedlagd på 
www.newsweb.no eller www.vekselbanken.no